Son moitas as pezas do museo que teñen viaxado, nalgunha ocasión ata ben lonxe, para formar parte dalgunha exposición temporal organizada por outras institucións. Un dos traballos que ocupan as áreas de documentación, de conservación e de administración é a xestión xerada polo préstamo de pezas. A presenza dos fondos en exposicións temporais de moi diferentes índoles, supón unha oportunidade para dar a coñecer o museo e o mesmo tempo contribuír a crear novos contextos para as obras e con isto ofrecer novas historias, novas visións, en definitiva, novas formas de achegarse a elas. Os catálogos destas exposicións son ó final a testemuña permanente da temporalidade das mesmas e neles recóllese parte da investigación acometida dende o museo.
