SALA I

A peregrinación entendida como un percorrido emprendido individual ou colectivamente coa finalidade de buscar a purificación, a perfección, a salvación ou a mera aproximación a Deus, permite establecer lazos de unión entre as máis heteroxéneas manifestacións relixiosas. De este modo, imaxes fotográficas pertencentes ás diferentes peregrinacións existentes en diversos países (Grabarka en Polonia, Ajmer na India, Lalibela en Etiopía, etc.), obras artísticas, literarias, lúdicas mesmo, así como determinados obxectos rituais, son utilizados nesta sala como punto de partida para internarnos no mundo da peregrinación en sentido espiritual e alegórico antes de incidir, de xeito particular, na significación e demais singularidades propias da ruta xacobea.