Modo manual

Tino Martínez (Santiago de Compostela, 1943) é o paradigma dun profesional da fotografía analóxica. Ao longo de máis de catro décadas chegou a dominar todo o proceso da disciplina, desde a súa concepción ata a súa exposición, da toma ao revelado. A súa traxectoria é unha auténtica lección de fotografía a través da súa forma de ver e contar, de descifrar os encadres, as luces e os tempos; da escolla dos escenarios, da delicada preparación das ferramentas e da precisa selección das técnicas.

Modo manual é unha forma de facer as cousas, máis pausada, honesta e consciente. Esta exposición acolle un dobre relato: a cidade vista desde a mirada de Tino e as fotografías tomadas desde o coñecemento e a experiencia do autor. Non se procura mostrar unicamente escenas de Santiago, senón tamén revelar os procesos e as técnicas que fan posible a súa creación. Tino Martínez convértese así nun artesán da paisaxe e das persoas, que elabora unha visión de Santiago inconfundiblemente analóxica.

PANORÁMICAS E NOCTURNOS

O dominio da técnica fotográfica déixase ver nas súas panorámicas e nocturnos. O seu control da química permitiulle acadar positivos de ata un metro e dominar o cibachrome, a diapositiva directa que xoga cun cromatismo extraordinario. Nas longas noites sen lúa conseguiu acadar un negro tizón e logrou a atmosfera desexada con ata 1.200 escintileos de flash. Nas súas notas de campo quedaron recollidos os datos que permiten reconstruír o proceso de captura e que remiten a unha ética do traballo solitaria de principio a fin.

RETRATOS

Tino Martínez recolleu persoeiros e amizades da vida compostelá durante máis de corenta anos. Traballou como un retratista do individuo, observador das mans, da mirada, do emprazamento e da vestimenta. Os seus retratos son manufacturas introspectivas dos personaxes.

Positivado: impresión en papel baritado Platine 320 g

TINO MARTÍNEZ

Tino Martínez (Santiago de Compostela, 1943) comezou coa fotografía de forma autodidáctica aos 13 anos, fascinado polo cine e os procesos químicos da luz. Esta paixón temperá converteuse nunha vocación e na súa carreira profesional, que hoxe supera os corenta anos de actividade initerrompida. A traxectoria de Tino desenvolveuse na rúa, no seu estudio da rúa Nova, e no seu laboratorio, sempre en contacto coa vida vicil, política e cultural da capital galega. Durante todos estes anos a súa cámara foi testemuña invisible pero omnipresente dos momentos clave da cidade

 

 

MÁIS INFORMACIÓN