DÍA DAS BIBLIOTECAS 2024

Comezamos o Día das Bibliotecas, 24 de outubro de 2024, celebrándoo nas redes sociais do Museo das Peregrinacións e de Santiago. O lema deste ano é «Por un futuro sostible».

As bibliotecas, grazas as súas coleccións e servizos gratuítos, axudan a construír unha sociedade cada vez mellor informada, solidaria e xusta, en loita contra calquera tipo de desigualdade. 

Que mellor forma de festexalo que regalando libros! Visita a nosa sede de Praterías, a partir das 11.30, e adopta un dos exemplares que liberaremos!

Tamén estreamos centro de interese na nosa sala de consulta: A inventio.  A inventio xacobea é un dos piares dos mitos e a tradición do culto ao apóstol Santiago. Segundo esta, a revelatio recíbena un ermitán, Paio, que observa unhas estrañas luminarias nun cemiterio abandonado; e o bispo de Iria, Teodomiro, que, tras varios días de xexún e meditación, visita o lugar e recoñece alí o sepulcro apostólico (inventio). Segundo a tradición, este será a orixe da cidade de Compostela e da peregrinación.

Se che interesa, vén á nosa biblioteca! Fixemos unha escolma da bibliografía sobre o tema.
O noso horario é de luns a venres, de 9.00 a 14.30 h.

Feliz Día das Bibliotecas 2024!